విజయ్ ప్రమాణ స్వీకారం ఆలస్యమవుతోందని.. నిప్పంటించుకున్న టీవీకే కార్యకర్త

తమిళనాడులో రాజకీయాలు తీవ్ర ఉత్కంఠ రేపుతున్నాయి. నటుడు విజయ్ నేతృత్వంలోని తమిళగ వెట్రి కళగం (టీవీకే) ప్రభుత్వ ఏర్పాటు వ్యవహారం నిన్నటి వరకు ఒక కొలిక్కి రాకపోవడంతో, ఆయన అభిమానులు తీవ్ర ఆందోళనకు గురవుతున్నారు. విజయ్‌ను ముఖ్యమంత్రిగా చూడాలన్న కోరిక నెరవేరడం ఆలస్యమవుతోందని మనస్తాపం చెందిన 40 ఏళ్ల ఇసక్కియప్పన్ అనే కార్యకర్త శనివారం తిరునల్వేలిలో ఆత్మహత్యాయత్నానికి పాల్పడ్డాడు. ఒంటికి నిప్పంటించుకోవడంతో అతనికి తీవ్ర గాయాలయ్యాయి. ప్రస్తుతం ఆసుపత్రిలో చికిత్స పొందుతున్నాడు. నాలుగు నెలల క్రితం కూడా విజయ్ సీఎం కావాలని కోరుతూ ఇసక్కియప్పన్ 16 అడుగుల పొడవైన శూలంతో తన బుగ్గలను గుచ్చుకోవడం గమనార్హం.

ఇటీవల జరిగిన అసెంబ్లీ ఎన్నికల్లో టీవీకే 108 స్థానాలు గెలుచుకుంది. అయితే, ప్రభుత్వం ఏర్పాటుకు అవసరమైన 118 మేజిక్ ఫిగర్‌కు మరో 10 మంది ఎమ్మెల్యేల మద్దతు అవసరం ఉండటంతో ప్రభుత్వ ఏర్పాటుపై గందరగోళం నెలకొంది. ప్రభుత్వ ఏర్పాటుకు అవసరమైన సంఖ్యాబలం ఉందని భావించిన విజయ్ గత మూడు రోజుల్లో మూడు సార్లు గవర్నర్ రాజేంద్ర విశ్వనాథ్ అర్లేకర్‌ను కలిశారు. అయితే, మెజారిటీకి అవసరమైన సంఖ్య ఇంకా లేదని స్పష్టం చేసిన గవర్నర్, ఆయనను వెనక్కి పంపారు. దీంతో విజయ్‌ ముఖ్యమంత్రి కాలేకపోతున్నారన్న మనస్తాపంతో ఇసక్కియప్పన్ ఆత్మహత్యాయత్నానికి పాల్పడ్డాడు. 

కాగా, ఎట్టకేలకు విజయ్‌కు అవసరమైన మద్దతు లభించింది. కాంగ్రెస్‌తోపాటు  వీసీకే, ఐయూఎంఎల్ మద్దతు పలకడంతో విజయ్ ముఖ్యమంత్రి కావడానికి మార్గం సుగమమైంది. ఈ ఉదయం 10 గంటలకు విజయ్ తమిళనాడు ముఖ్యమంత్రిగా ప్రమాణ స్వీకారం చేయనున్నారు.